霏 竟然
2010-09-04 13:32:36
畀我一個美好但系又唔好咁冇譜的希望
當你睇到一部電影,覺得「嘩,有冇搞錯,拍成咁都有嘅,離曬大譜」的時候,請你睇下韓國電影。離譜算咩遮?冇譜先至系境界。
以往一般都系指導d學生寫影評,偏偏最近廿九年都冇乜學生,剎時間親自寫,真系有小小唔慣。
一眼lap去,仲以為呢部電影要講兩個社會邊緣人作奸犯科的美好生活,偏偏又搞精神體驗,物質生活貧乏到嘔,明明有火機又鑽木取火,又用洗頭水來毒瓜d魚,仲要摞個座sit當鏟種粟米,最後一嘢自然災害冚棒啷冇曬。李海俊李生,你做編劇做到咁後現代,你叫我地呢d物質男女點follow到你。
最難跟要算個結局。大佬,你爭人條數幾十萬美金先跳海噶嘛。半年啊,半年利疊利,就算爭人10蚊都一嘢炒起你啦,你條女又冇乜錢,除咗部單反就得個頭盔可以換翻兩舊水,咁你點生活遮?唔通用你八達通淨翻落來果4600蚊韓幣買洗頭水,然後又去江邊毒魚咩。
李生,你監粗喺呢個moment結束電影,叫我地呢d對美好人生充滿住希望,但系又理性爆棚的電影愛好者情何以堪呢?