詐詐蒂…..同你四處拱

************這篇影評可能有雷************

接住「詐詐蒂…..同你四處拱」, 袁詠儀演嘅阿敏係新不了情中同祖利亞(70年代著名混血歌手) 合唱一曲粵語小調, 搞笑輕鬆, 恢諧幽默, 現實係幕後代唱, 但袁小姐的咪嘴演出活靈活現, 而她係戲入邊由天真爛漫演到黯然落魄, 憔悴情深, 好到無話可說.
但戲之所以咁好睇, 並不只主角演得出色, 劇本紮實, 無流於一般絕癥純愛電影的濫殤, 固然係成功的關鍵, 而對一干配角的塑造更係無的彈.
例如驚喜發現劉以達先生早在此片已展示佢演藝才華, 比零零發早了三年! 飾演返樂師此訂做角色, 入型入格.
難得仲有邱禮濤先生, 作為著名導演加搖滾樂手, 同年他導嘅人肉叉燒包還幫秋生哥首次稱帝, 兼擊敗此片有對手戲嘅青雲老弟, 劉生頒獎禮後醒起此事應倍感奇妙.
還有張同祖先生, 客串酒吧老闆, 佢下年客串金枝玉葉嗰場都變咗經典愛情場面.
剛才有提嘅祖利亞先生只出一場, 也貢獻咗動人聲線.
秦沛先生力扶細佬, 第N次係爾冬升導演嘅戲壓陣, 細佬將全片點題金句交俾佢演繹, 而佢潤物無聲, 不動聲色, 無搶風頭就交足嗮戲.
艷名播於天下的張小姐多屆影后張艾嘉小姐也友情演出, 佢當年同爾生做過情侶嗎, 可能無, 因她係嘉禾嘅, 而爾生係死對頭邵氏嘅, 可能係咁, 為咗合作一次, 點都來客串一次, 她無欺場.
劉嘉玲小姐當時仲係做花瓶嘅階段, 美術同她設計衣著每次都是利用她高挑嘅身材, 用委地長裙突出她高貴大方, 醫院那場已顯出她其實演技不俗, 演來不搵不火.
吳家麗小姐係1987年同發哥係龍虎風雲的大膽而精彩演出令她一炮而紅, 此次同樣無失手, 更加成熟更加圓潤. 我第一下流下眼淚之時亦即係戲中阿傑睇到之時, 一個藝術家就算平時無甚特別, 但係踏上虎度門, 來真嘅, 即刻大變樣, 我太容易被感動了, 吳小姐並非粵劇科班出身, 這場演出雖不用真唱, 身段做手氣場氣勢強勁, 才打動了我.
不過她都係輸俾一個人, 就是縱橫影壇四十年的馮寶寶小姐(當年才是現已算退休), 她也眾望所歸地再奪金像獎最佳女配角, 前段大頭特寫她不怒而威已盡顯功架, 最後唱出一曲」黎明在望」, 四十年功力所聚, 她由小做戲, 可謂嘗盡甜酸苦辣, 表面童星風光,實則失去童年之苦楚不為人道.
雖則並非現場演唱, 演出之動人, 可以勉強一比嘅只有後學晚輩安妮夏菲維(孤星淚), 而我好似孤星, 這一曲, 眼淚係無停過, 流到出片尾字幕先停.我是做唔到 不以物喜, 不以己悲.
人年紀越大, 越來越脆弱, 看呢齣戲之前, 成夜失眠, 起床後直頭週身骨痛, 成身唔舒服, 戲院出來後(即流淚之後), 卻神清氣爽, 莫非係情緒發洩咗, 我真是戲院異形, 入戲院即刻叉足電.

  舉報