【電影】15040[9.15]《進擊的巨人：前篇》

有《浪客劍心》嘅驚喜做鋪墊，原本以為我曾經非常熱衷嘅《進擊的巨人》，一部咁hit嘅動漫嘅真人電影應該亦唔會差得太離譜，但明顯我忽略咗一個地方——「劍心」係歷史劇，而「進擊的巨人」係科幻片。

雖然話霓虹國係奧特曼同哥斯拉嘅家鄉，但誠如日本經濟都衰退咗咁多年，同鬼佬一日千里嘅特效渲染比，特攝片早已唔係嘎仔嘅專利。想想都咁多年過去，嘎仔仲係用奧特曼嘅技術去拍科幻片，理所當然會遠遠咁落後於時代。電影中除咗超大型巨人嘅渲染係做的稍微俾啲咁多心機之外，其他巨人完全就係最古老嘅錯位加模型嘅物理特攝技術，無數嘅唔自然只能靠嘎仔最慣用但又用得最爛嘅超誇張演技去搭夠。

劇本改編係好，加入戀愛、野合、新人物等等增加樂趣都無可厚非，但硬生生將人氣最高嘅利威爾兵長換成一個生得好似吳賤豪嘅高大阿叔，仲安排佢同艾倫、三笠展開三角戀戲碼就未免有啲太狗血了。加上呢個賤豪全程一臉壞笑，各種挑撥離間，令人不禁生厭。

本片最值得表揚嘅係巨人吃人場景同Cosplay服裝組，前者基本達到咗原作血腥嘔心嘅效果，將巨人世界中嘅殘酷同絕望表現咗出嚟；後者係係所有演員嘅表演基本上都爛得一塌糊塗嘅情況底下將兵團服裝比較精細咁還原曬出嚟，雖然呢點對周街Cosplay嘅霓虹國係最冇難度嘅挑戰，但係呢部乏善可陳嘅渣片裡面，亦算係值得提到嘅亮點了。

話說劇組係最後很有心咁剪咗一條預告上去，但唔睇由自可，睇完之後，原本已經唔抱任何期待嘅我更加心灰意冷，可以安心洗洗睡了。

「請把整個劇組都交給巨人吧！」

爛片，還係返去睇漫畫吧，唔推薦，秒刪。