潮爆Ryohei
2016-01-31 08:11:26
【電影】16005[1.29]《攻殼機動隊 新劇場版》
即使我唔係動畫TV原著黨,但仍然可以硬生生睇倒新劇場版同舊作明顯嘅級差,彷彿映照住昔日日本中流砥柱嘅I.G Production亦伴隨旭日嘅餘暉沉下地平線。近年動畫睇少咗,唔知道係咪日本動畫都如新「EVA」劇場版一樣開始通通轉畫風,慢慢螢幕上90年代熟悉嘅厚實動畫筆觸已經被電子繪圖嘅新世紀二次元人像所替代,劉海被剪短嘅少佐霎時間御姐風全無,睇上去就係一個稚嫩嘅中二妹。
攻殼最吸引人嘅地方係政治、末世界科學同哲學,呢啲元素本片都有,但每一樣都表現得如此令人惋惜。首先,政治係本片表現得最差嘅地方,整個陰謀既唔高明亦唔高尚。其次係末世界科學,除咗不斷重復出現嘅心靈房間外,電影基本上冇乜嘢令人眼前一亮嘅高科技,講得最多嘅就係大鐵人打大鐵人。最後係最重要嘅哲學,可能因為電影發生係TV之前,並未真正開始系統性「攻殼」,對於GHOST嘅探討接近於零,義體嘅意義更多隻係為咗引出政府嘅陰謀,而唔係討論倫理同AI定義嘅焦點,就呢一點而言,本集就已經失去咗絕大部份嘅話題性。
不過,較之半個月前睇嘅「機動警察」,攻殼還係好太多了,所以話動畫人還係專心做動畫吧,隨便唔好搞什麼混業經營。
片尾,草薙重演「傀儡師」中一模一樣嘅空中射殺,為25週年致敬之餘,想必觀眾更期待睇倒嘅唔單止係經典重溫,而係質量能與舊作媲美嘅新劇場版。
尚可,保留意見,不收藏。