【電影】16027[5.10]《踏血尋梅》

雖然大家都話香港電影已經沒落，但我仍然習慣咁關注一年不如一年嘅金像獎。今年有一部名不見經傳嘅電影，打住一個文藝嘅標題，橫掃咗最佳男主、女主、男二、女二、新人在內，所有表演類獎項，震驚全城，亦震驚咗我，由此揭開一單被塵封咗8年嘅命案。

春夏時節，一個16歲嘅援交少女係劏房交易中被殺害，再被殘忍肢解後拋屍，我承認，當初就係沖住其中嘅cult成份而嚟。觀眾自然希冀係其中搵到愛情嘅蹤影，結果我哋亦「如願」見證咗佳梅嘅愛情、丁子聰嘅愛情、臧sir嘅愛情，但事後我哋又會反問返自己，佢哋擁有過嘅真係愛情嗎？

有人話，本片所以會羅獎，因為佢拍出咗真正嘅香港電影嘅味道，我唔認同。我哋心目中嘅香港係點樣嘅？八、九十年代港產片最輝煌嘅時候螢幕上香港嘅形象絕對唔係此時此刻嘅模樣，果陣嘅香港係華語世界嘅文化首都，佢代表住財富同菁英，到《無間道》入邊嘅兵賊遊戲，大家都係一派衣冠楚楚嘅外表。但本片從果個滿頭白髮，鬍子拉碴嘅郭富城開始，電影一直係度向觀眾展示住最齷齪嘅香港暗角，令我作為一個大陸lei都難以接受。逼仄邋遢嘅劏房，墮落嘅角色，製作假信用卡嘅工廠，永遠黏糊糊嘅白只，呢種渣滓嘅社會最底層嘅生活環境令我作嘔，佢絕對無法代表香港人心中高高聳立嘅尊嚴，當然亦算唔上真正嘅香港電影嘅味道。

張愛玲講，「通往女人心裡的通道是陰道」，雖然唔全對，但亦不可否認其中嘅道理，女人有時可能比男人更容易敗倒於性。年僅16歲嘅援交少女既抵擋唔住陰道對內心嘅觸動，亦抵擋唔住情竇嘅感召，悲劇早已係一開始就埋下咗伏筆，破碎嘅家庭、貧窮嘅環境、大陸lei嘅身份都只不過係殘破嘅軀殼上重重咁再捅上幾刀。回答返前文嘅問題，社會嘅最底層其實唔擁有獲得愛情嘅資格，一段守唔住嘅愛，得嚟又作何用呢？

唔知應該慶幸定其實係我嘅不幸，我生活係一個繁忙嘅世界，有一定嘅物質基礎，有自認為值得去承受嘅壓力，我亦有過空虛嘅時候，果種內心被吞噬嘅感覺抓唔到邊際，就好似墜入狄拉古之湖，永遠唔可能再逃出嚟。殺人嘅其實係空虛。

原嚟我亦睇過導演嘅另外兩部戲——《明媚時光》同《救火英雄》，風格迴異，畫風差距之大令人難以聯想。5項最佳表演金像獎都絕對實至名歸，就算係最討厭嘅郭富城，我呢次亦被佢折服了，完全接受咗佢呢個角色。

現實總是殘酷，想想果個一直為女兒驕傲嘅父親，還有臧sir嘅動情落淚，一剎那為之愴然。

「致遠方的嘉梅」

深沉，拍得十分認真，腦海仍不住呈現春夏仰望天空嘅大眼睛。推薦，不收藏。