【電影】16039[7.26]《樹大招風》

杜SIR真係好識得搵題材，97年世紀之交，係「獨裁者」進駐前夕，老彭放任民粹主義膨脹之際，香港經歷過佢歷史上最茫然同動盪嘅日子，所謂亂世出英雄，特殊嘅時代背景，為90年代增添咗最濃重嘅傳奇色彩，亦成為往後無數影視創作嘅最佳靈感源泉。

作為自細睇無線同亞視大嘅珠三角九零一代，我嘅童年從六點半新聞報導記低咗2個名字——一個係走失嘅弱智仔余文翰，另一個就係被記入金氏世界紀錄嘅賊王張子強。從綁架李澤鉅，勒索嚟破紀錄嘅10個億，係果個老竇老母工資不過一千幾百嘅年代，震驚咗所有人，到不過幾年之後又迅速係離我屋企不過幾公里嘅地方落網，就此佢成咗果陣最熱門嘅談資。

但畢竟當時年紀尚幼，除咗張子強，我對葉繼歡同季炳雄都了解甚少，與其話睇情懷同故事，不如話睇林家棟、陳小春同任賢齊如何飈戲。演慣蠱惑嘅林家棟無疑最好戲，季炳雄機智得嚟冷酷無情，舉手投足間蘊含嘅資訊量巨大，內心戲耐人尋味；小春張狂嘅痞子氣息亦吻合張子強嘅囂張，一心想撮合三大賊王大幹一場嘅大戲算得上係佢嘅本色演出，自然手到擒來；只係任賢齊扮演嘅葉繼歡，係片頭板寸黑鬚造型下仲有些許悍匪嘅影子，換上西裝革履後即使再揸返AK都殺氣大減，斯文得有點過了，唔咸唔淡嘅潮汕話粗口氣勢全無。

除咗3位主角同一眾綠葉嘅表演算得上精彩，我覺得本片其實同一般嘅警匪片無異，故事平鋪直敘缺乏懸念，既唔緊張亦唔刺激，同印象中嘅杜琪峯電影相去甚遠，只係因為難得遇上一個熟悉嘅大賊，為觀影體驗稍微增添咗一絲親切感而已。

片尾一曲比我還大年紀嘅《讓一切隨風》照應全片，跨越97，上一個時代已經隨風而逝，與其緬懷過去，不如放眼未來。

尚可，實際比預期有頗大落差，不推薦，不收藏。   舉報